ავტორის შესახებ
ნონა კუპრეიშვილი ( დ. 29 ოქტომბერი, 1952 ) – მეცნიერი, ფილოლოგი.
დაამთავრა ივანე ჯავახიშვილის სახელობის თბილისის სახელმწიფო უნივერსიტეტის ფილოლოგიის ფაკულტეტი 1975 წელს. მუშაობდა უფროს და უმცროს მეცნიერ თანამშრომლად ი. გრიშაშვილის სახელობის თბილისისა და გ. ლეონიძის სახელობის ლიტერატურულ მუზეუმებში. 1991 წლიდან მუშაობდა ქართული ლიტერატურის ინსტიტუტში, მე-20 საუკუნის ქართული ლიტერატურის შემსწავლელ განყოფილებაში უფროს მეცნიერ თანამშრომლად. 2013 წელს გამოიცა მისი კრიტიკული სტატიებისა და სამეცნიერო წერილების კრებული "სიტყვის დეგუსტაცია", რომელიც ლიტერატურული პრემიის "საბას" ფინალისტი გახდა. 2015 წელს გამომცემლობა "არტანუჯის" მხარდაჭერით და მისივე რედაქტორობით გამოიცა ვახტანგ კოტეტიშვილის ლიტერატურულ-კრიტიკული და პუბლიცისტური წერილების 560 გვერდიანი კრებული. წლების განმავლობაში თანამშრომლობდა ლიტერატურულ ჟურნალებთან და გაზეთებთან (განსაკუთრებით "ჩვენი მწერლობა", "არილი", "ლიტერატურული გაზეთი"), სადაც აქვეყნებდა სტატიებს მიმდინარე ლიტერატურული პროცესების შესახებ.
