„ფუკოს ქანქარა” იტალიელი მწერლისა და მეცნიერის, უმბერტო ეკოს (1932-2016) მეორე რომანია, რომელიც მის წინა რომანზე, „ვარდის სახელზე“ უფრო ხმაურიანი გამოდგა. ისტორიული ფაქტებით მდიდარი, განუმეორებელი სტილით გამორჩეული თხრობა დღესაც ხიბლავს მკითხველს, მიუხედავად იმისა, რომ რომანის გამოქვეყნებიდან თითქმის მესამედი საუკუნე გავიდა.
მილანის ერთ-ერთი გამომცემლობის რედაქტორები ოკულტური მეცნიერებებით, საიდუმლო საზოგადოებებით, მსოფლიო შეთქმულებებით ერთობიან და თამაშ-თამაშში შორს შეტოპავენ – მოიფიქრებენ ე.წ. „გეგმას“, რომელსაც მართლა დაიჯერებენ „ბნელი ძალები“ და დაუნდობელ ბრძოლას გამოუცხადებენ საიდუმლოს გასაღების ხელში ჩასაგდებად.